تألقت نجمات الوطن العربى على السجادة الحمراء خلال إفتتاح مهرجان الجونة السينمائى الدولى فى دورته الثانية بمصر، بالظهور بمجموعة متنوعة من الفساتين لأشهر مصممى ودور الأزياء العالمية .
وعلق خبير وناقد الموضة محمد الشريف على إطلالات المشاهير بالمهرجان فى تصريحات خاصة لمجلة ( أناقتى ) كما وصفها على طريقته الخاصة كالآتى :
إطلالة الفنانة بشرى بمهرجان الجونة السنيمائى
الفستان حلو اوى بس للأسف مش لايق عليها و خصوصا من الجزء العلوى عند الصدر غير كده كله حلو بالنسبة للميك اب هادى و ناعم بس لون ال lipstick باهت شوية كنت افضل لون اغمق شوية و الشعر حلو و الفستان من تصميم المصمم زياد نكد.
إطلالة الفنانة أروى جودة بمهرجان الجونة السنيمائى
الفستان safe بسيط جدا مش مكلف الميك اب و الشعر حلو تنسيق المجوهرات جميل الفستان من تصميم المصممة زينة حسنى.
إطلالة الفنانة درة بمهرجان الجونة السنيمائى
الفستان حلو و شيك من فوق اما من الوسط لتحت حسيت نفسى تايه حسيته مش راكب على بعضه كنت اتمنى انو يوضح رشاقة درة و تفاصيلها اكتر اما الشعر و الميك اب بصراحة تحفة و التنسيق بنهم يجنن و الفستان من تصميم المصمم جورج حبيقة.
إطلالة الفنانة نادية الجندى بمهرجان الجونة السنيمائى
الفستان حلو اوى و لايق عليها جدا بجد قمر قمر و شيك طلة شبابية ربنا يحفظك يارب و بالنسبة للميك و الشعر بينهم تنسيق جميل اما المجوهرات كانت قمة فى الشياكة و النعومة من احلا الإطلالات بجد و الفستان من تصميم المصمم هانى البحيرى.
إطلالة الفنانة إنجى المقدم بمهرجان الجونة السنيمائى
حبيت الفستان لايق عليها جدا و الميك اب جميل سموكى حلو جدااا الشعر منسق كنت افضل بس لو فى حلق ناعم و حجمه صغير عشان يدينى شياكة اكتر و الفستان من تصميم مهند كوجاك.
إطلالة الفنانة يسرا اللوزى بمهرجان الجونة السنيمائى
الفستان بسيط لايق اوى عليها و على رقيتها طالعة قمر و جميلة كالعادة و الميك اب و الشعر جمال جدا مشكلتى الوحيدة فى طول الفستان كنت افضل لو يبقى لى ديل طويل كان هيبقى احلى و الفستان من تصميم المصمم باسيل سودا.
إطلالة الفنانة سلمى ابو ضيف بمهرجان الجونة السنيمائى
من احلى و اجمل الفساتين اللى فى المهرجان بجد إطلالة perfect من فستان للميك اب و الشعر كمان التنسيق قاتل و الفستان من تصميم المصمم جورج حبيقة.
إطلالة المطرب خالد سليم و زوجته الفاضلة بمهرجان الجونة السنيمائى
شياكة و رونق و بساطة السهل الممتنع وكفى
تصميم التوكسيدو من المصمم احمد حمدى
إطلالة الفنانة دانيلا رحمى بمهرجان الجونة السنيمائى
الفستان حلو و بسيط و ناعم الميك اب جميل بس الشعر كان ممكن يكون افضل العقد ده كارثة مش لايق ابدا على الفستان و الفستان من تصميم المصمم زهير مراد.
إطلالة الفنانة دينا الشربينى بمهرجان الجونة السنيمائى
برج الحوت يا جماعة يعنى القمر ضحكتها جميلة بجد بالنسبة للفستان هو بسيط و حلو بس مش لايق على المهرجان و لا على ال redcarpet ابدا و كمان محبتش فى الدنتال اللى على البطن مخلى شكله رخيص اوى للأسف بالنسبة للشعر جميل اوى عليها الميك اب كان باهت مش باين اصلا بس هى بينطبق عليها مثل سمراء ضحكت فأوقعت الرجال بحبها
إطلالة الفنانة مى عمر بمهرجان الجونة السنيمائى
الفستان شيك مع انو Deja Vu و مخليها اميرة بس الكورساج من عند الصدر كنت افضل انو يبقى اوسع ٢سنتى كمان و يكون فى لو حزام رفيع عن الوسط لتحديده بس بالنهاية لايق عليها جدا و طالعة قمر الشعر و الميك اب بنهم تنسيق حلو جدا و المجوهرات كمان اختارت حاجة ناعمة و مش مكلفة و الفستان من تصميم المصمم مايكل سينكو
إطلالة الفنانة مايا دياب بمهرجان الجونة السنيمائى
الفستان قمة فى الشياكة و الرقى و فى طابع ال edgy بحب اوى اللون الأسود على ال red carpet بيدى رونق و كلاس بالنسبة للشعر و الميك اب السموكى كانو روعة كمان شرفتينا يا مايا فى المهرجان و الفستان كان من تصميم نيكولاس جبران.
إطلالة الفنانة صبا مبارك بمهرجان الجونة السنيمائى
الفستان شيك جدا عليها واستعمال البايت مع الريش كان موفق و قصة الميراميد حلوة عليها مع ان جسمها pear shaped و يليق عليها اكتر الفساتين المنفوشة من تحت بس طالعة قمر جداا و الميك اب و الشعر كان تحفة و الفستان من تصميم المصمم مايكل سينكو.